اقسمت عليك بالله لتدخل

:><: : بسم الله الرحمن الرحيم
السلام عليكم ورحمة الله وبركاته..

ازيكوا كلكوا يا احلى اعضاء لاحلى منتدى.. ان شاء الله يارب تكونوا كلكم بخير وصحة وسعادة.

النهارده يا اخواني واخواتي الكرام بقدم ليكم كلكم دعوة..
وصدقوني اللي مش هيلبي الدعوة هوه اللي هيكون خسران..

ايه رأيكوا ما نكونش بس مجرد اعضاء في منتدى من المنتديات بندخل وبنطلع وبنحط مواضيع وبنشارك في غيرها وبنلعب شوية ونتسلى شويتين؟؟

ايه رأيكوا لو نيجي يوم القيامة ماسكين في ايد بعض.. فرحانين ببعض .. مستبشرين بالرحمة والمغفرة من رب العالمين.. حتى واحنا مانعرفش بعض في الدنيا.

صدقني.. صدقيني، اكيد هيجيلك يوم هتسيب/هتسيبي المنتدى ده.. هيبقى ذكرى بالنسبة ليك/ليكي

صدقني.. صدقيني،اكيد هيجيلك يوم هتسيب/ هتيبي الدنيا دي كلها بكل ما فيها.. وهتندفن/ وهتندفني تحت التراب..فعلا الكل هيزعل عليك/عليكي في البداية.. وبعدين؟؟

هل في حد هيكون معاك/ معاكي في قبرك؟!
هل في حد هيجي يزورك كل يوم ويتكلم معاك؟!
هل في حد هيقدر ينفعك أو يضرك؟!
هل في حد يقدر يبعد عنك الاحساس بالخوف والفزع من العذاب والظلام؟!
هل في حد يقدر يوسع عليك قبرك اللي انتى/ انتي محشور/محشورة فيه؟!


ماتقولش لا ، لانه في .
ايوه في..


في.............









ايوه مفيش غيرها، هيه..........



اعمالك الصالحة في الدنيا.




امانة عليك يا كل من دخلت الموضوع ده تعاهد نفسك دلوقتي قدام ربنا اللي هوه شاهد عليك وعالم بكل اللي في نفسك وبكل اللي بيدور في فكرك دلوقتي..
ايوه خليك/ خليكي جدع/ جدعة وخد على نفسك العهد ده..
خليك قوي/ قوية ولو لمرة واحدة في حياتك..
اهزم الشيطان يا اخي/يا اختي ولو لمرة واحدة في عمرك كله، ده ياما هزمك وضحك عليك/ عليكي..
اثبت لنفسك انك راجل بجد، واثبتي لنفسك انك فعلا تقدري على نفسك ..


وده عهد بسيط جدا والله.. نتفق كلنا عليه ونواظب عليه ان شاء الله لحد ما يتوفانا الله الذي نسأله برحمته وكرمه وفضله أن يمن علينا بحسن الخاتمة نحن وجميع المسلمين ان شاء الله يارب (قول/ قولي آميييييييييين، حتى دي مكسل تقولها يا اخي/ تقوليها يا اختي الله يهديكم ويكرمكم يارب).

بصوا.. مش عايزة اطول عليكوا اكتر من كده.. خلينا نتفق على العهد ده يمكن لما نيجي يوم القيامة ونقف قدام ربنا سبحانه وتعالى.. نقدر نقول يارب يا اكرم الاكرمين..
ايوه احنا مانعرفش بعض معرفة شخصية.. بس الله الله لو على الرغم من عدم معرفتنا لبعض نجتمع كلنا على طاعة واحدة في الدنيا.. ونيجي نعرف بعض يوم القيامة.. نيجي مستبشرين بعملنا اللي احنا عملناه ده في الدنيا..

انا عارفة وكلكوا عرفين ان معظم او حتى كل اعضاء مصرية بيسهروا للفجر او حتى بعده ولحد ما الشمس تطلع..
ايه رأيك لو تقوم في الفترة دي خمس دقائق بس تصلي لله ركعتين قيام ليل.. والله يا اخي/ ويا اختي لو تعرفوا اد ايه ثواب العمل ده عند رب العالمين.. مش مهم تكتر المهم تواظب..
قوم في التلت الأخير من الليل وصلي .. وادعي ربك اللي بينزل الى السماء الدنيا في الوقت ده وبيستجيب دعاءك ان شاء الله.
ايه.. حسيت انك ضيعت وقتك في قرآءة موضوع او حاجة انتا مش هتعملها..
لا والف لا .. دي امانة عليك .. تعاهد نفسك دلوقتي انك تعمل العمل ده
دول ركعتين.. ركعتين بس، واللي يكتر يبقى ربنا يجزيه كل خير ويتقبل منه يارب
للدرجة دي الركعتين دول تقال اوي على قلبك.. اشمعنى المعاصي بنروح نجري عليها.. اشمعنى بنقعد على النت 4 و5 و6 ساعات.. اشمعنى بنخرج كل يوم مع اصحابنا ونتفسح وننبسط؟!

ده انا بقولك خمس دقائق بس..
وصدقني/صدقيني،الطاعة دي حلاوتها في ان هتكون طاعة جماعية.. كلنا ان شاء الله هنجتمع على طاعة الرحمن..
تخيل لو ربك الكريم سبحانه لما انتى/انتي عاهدت نفسك دلوقتي على القيام بالطاعة دي الى ان يتوفاك الله كتبك دلوقتي من الناجين من النار.. تخيل لو العمل ده هوه اللي ينجيك يوم القيامة.. هوه اللي يطلعك من النار؟!

اتمنى يكون قصدي وصل ليكوا كلكم
وصدقوني انا مش مهم عندي تردوا وتقولوا شكرا او ميرسي على الموضوع
المهم عندي في ردك انك تثبت عهدك ده وتأكده قدامنا بعد ما تعاهد نفسك قدام رب العالمين اللي هوه احسن من الكل طبعاً.

وانا اول واحدة فيكوا بعاهد نفسي قدام ربنا وقدامكم كلكم اني ان شاء الله مااسبش الركعتين دول في حياتي الا لعذر معين خارج عن ارادتي او لنسيان او لأي ظرف طارئ خارج عن ارادتي.

يلا اتشجع/ اتشجعي .. يا ترى مين اول واحد/واحدة يتسابق لطاعة رب العالمي عزوجل؟
بس خلي بالك، الاخلاص ثم الاخلاص ثم الاخلاص.. خلي العمل ده خالص لوجه الله بعيد عن الرياء وغيره.

ودلوقتي هسيبكوا مع الأدلة من القرآن والسنة على فضل صلاة قيام الليل:-

قيام الليل في القرآن

قال تعالى: { تَتَجَافَى جُنُوبُهُمْ عَنِ الْمَضَاجِعِ} [السجدة:16]. قال مجاهد والحسن: يعني قيام الليل.
وقال ابن كثير في تفسيره: ( يعني بذلك قيام الليل وترك النوم والاضطجاع على الفرش الوطيئة ).
وقال عبد الحق الأشبيلي: ( أي تنبو جنوبهم عن الفرش، فلا تستقر عليها، ولا تثبت فيها لخوف الوعيد، ورجاء الموعود ).
وقد ذكر الله عز وجل المتهجدين فقال عنهم: {كَانُوا قَلِيلاً مِّنَ اللَّيْلِ مَا يَهْجَعُونَ * وَبِالْأَسْحَارِ هُمْ يَسْتَغْفِرُونَ } [الذاريات:18،17] قال الحسن: كابدوا الليل، ومدّوا الصلاة إلى السحر، ثم جلسوا في الدعاء والاستكانة والاستغفار.
وقال تعالى: {أَمَّنْ هُوَ قَانِتٌ آنَاء اللَّيْلِ سَاجِداً وَقَائِماً يَحْذَرُ الْآخِرَةَ وَيَرْجُو رَحْمَةَ رَبِّهِ قُلْ هَلْ يَسْتَوِي الَّذِينَ يَعْلَمُونَ وَالَّذِينَ لَا يَعْلَمُونَ إِنَّمَا يَتَذَكَّرُ أُوْلُوا الْأَلْبَابِ} [الزمر:9]. أي: هل يستوي من هذه صفته مع من نام ليله وضيّع نفسه، غير عالم بوعد ربه ولا بوعيده؟!
إخواني: أين رجال الليل؟ أين ابن أدهم والفضيل ذهب الأبطال وبقي كل بطال !!

يا رجال الليل جدوا *** ربّ داع لا يُردُ

قيام الليل في السنة

أخي المسلم، حث النبي على قيام الليل ورغّب فيه، فقال عليه الصلاة والسلام: {عليكم بقيام الليل فإنه دأب الصالحين قبلكم، وقربة إلى الله تعالى، ومكفرة للسيئات، ومنهاة عن الإثم،ومطردة للداء عن الجسد } [رواه أحمد والترمذي وصححه الألباني].
وقال النبي في شأن عبد الله بن عمر: { نعم الرجل عبد الله، لو كان يصلي من الليل } [متفق عليه]. قال سالم بن عبد الله بن عمر: فكان عبد الله بعد ذلك لا ينام من الليل إلا قليلاً.
وقال النبي : { في الجنة غرفة يرى ظاهرها من باطنها، وباطنها من ظاهرها } فقيل: لمن يا رسول الله؟ قال: { لمن أطاب الكلام، وأطعم الطعام، وبات قائماً والناس نيام } [رواه الطبراني والحاكم وصححه الألباني].

وقال : { أتاني جبريل فقال: يا محمد، عش ما شئت فإنك ميت، وأحبب من شئت فإنك مفارقه، واعمل ما شئت فإنك مجزي به، واعلم أن شرف المؤمن قيامه بالليل، وعزه استغناؤه عن الناس } [رواه الحاكم والبيهقي وحسنه المنذري والألباني].

وقال : { من قام بعشر آيات لم يُكتب من الغافلين، ومن قام بمائة آية كتب من القانتين، ومن قام بألف آية كتب من المقنطرين } [رواه أبو داود وصححه الألباني]. والمقنطرون هم الذين لهم قنطار من الأجر.
وذكر عند النبي رجل نام ليلة حتى أصبح فقال: { ذاك رجل بال الشيطان في أذنيه !! } [متفق عليه].
وقال : { أفضل الصلاة بعد الفريضة صلاة الليل } [رواه مسلم].

وفي النهاية بقولكم.. انشر الفكرة البسيطة دي بين اهلك واصحابك.. خلينا نحيي صلاة قيام الليل من جديد..
اكيد فيه ناس فيكم مواظبين عليها ربنا يبارك فيهم يارب ويثبتهم ..
بس ما تقتصرش على نفسك وانشر العمل ده لعل الله يجعله في ميزان حسناتك يارب.
واتمنى اني ما اكونش طولت عليكم.. وسامحوني على اي كلمة خرجت مني بالخطأ ضايقتك او زعلتك..

وآخر كلمة هقولها.. اني ادعو واتمنى من الله الذي جمعنا في الدنيا على محبته ان يجمعنا في الآخرة في جنته، انه ولي ذلك والقادر عليه.
وصلى اللهم وسلم على سيدنا محمد وعلى آله وصحبه أجمعين.
والسلام عليكم جميعا ورحمة الله وبركاته.

بسم الله الرحمن الرحيم
اعد الله ثم انت ثم نفسى ان اقوم بصلاة اليل كل يوم طوال حياتى واتنمى من كل مسلم ومسلمة ان يقوموا بصلاة اليل وربنا يبارك لنا ولكم ويكتر من امثلكم




جاسمين

يارب تقبل هدايتي وتوبتي
بجد بارك الله فيك
اخوك اصلا بيصلي والحمد لله بس انا محتاج اني اصلح في نفسي شويه وشكر للموضوع ده بجد بارك الله فيك وجعلك زخرا لوالديك